De Generalversammeln

Tja, een kunn nich jümmer Glück hebben mit dat Wedder un so hett dat güstern Abend leider pladdert un pladdert. Trotzdem hebbt sick noch 23 Lüüe op den Weg maakt, üm bi use Generalversammeln dorbi to wesen. Obschons....eegentlich sünd dat 25 Lüüe wesen aber dorto noch mehr. De Vörsitter hett üm 18:15 Uhr de Versammeln anfungen un hett nah dat Begrööten un de Faststellung vun de Fähigkeit to´n Besluten ok de Verännerungen bi de Maaten ansproken. Leider is use Robert dootbleven un so könnt wi em leider nich mehr för siene 60 Johr inne Achimer Speeldäl ehren, aber dat is ok de eenzige wesen, de Gevadder Dood bi us affholt hett. Dorför un dat harr Robert seker freiht, hebbt wi nu twee Maten dorto kregen. Eene Schauspeelerin un een för achter de Böhn, so kunn dat wietergahn. In sien Bericht hett de Vörsitter nochmal betont wo he sick över denn Erfolg vun dat letzte Stück freiht un dat ok för dat tokamen Johr sick alle wedder anmellt hebbt. Dann gifft noch een poor Dankeschön för de Lüüe, de sick dat verdeent harrn un noch eene Ehrung:

Dieter Beinker ,35 Johr, so steiht dat op jeden Fall in use Ünnerlagen staht he nu schon op de Böhne un dorbi hett he an de 280 speelt.

(De genaue Tall wiest wi nich, dat verdarft bitieten de Överraschung.)

Dat geev bannig veel Applaus för em un dat jo ok torecht, wi freit us för em un dat he so lang dorbi is.

De Speelleiter Günther Kothe hett in sienen Bericht nochmal betont, wo goot düsse Saison wesen is. Dat weern bannig veele Tokiekers un de Reaktionen sünd dörweg positiv wesen. So freiht he sick al op de nächste Saison. De Berichte vun de Kassenbaas veröffentlich wi hier nich, aber dat is een godes Johr wesen, so veel könnt wi verraden. De Kassenpröfer hebbt ok nix to vermelln un so is de Vörstand eenstimmig entlast worden. Achteran hett Dieter Beinker denn Wahlleiter maakt un dor dat keen anneren Vörschlag geben hett un se ok woll alle tofreden mit denn olen werrn, geev dat eene Wedderwahl un Tim Beinker is de ole, nee Vörsitter vun usen Vereen. För de Wahl för den 2. Vörsitter is Nena Kelm vörschlagen worden. Stefanie Beinker hett ut Tiedtmangel "nee" seggt un so is Nena Kelm eenstimmig wählt worden. De Vörstand dankt Stefanie Beinker för ehre Arbeit un ehren Insatz. För de anneren Posten hett sick ok keen anneren funnen un so hett sick de Versammeln freiht, dat se de Lüüe in ehre Ämter bestätigen kunnen: Uwe Meyer as Kassenbaas, Günther Kothe as Speelleiter, Anika Bosenius as Schriftföhrerin un Herbert Görke as Böhnenobman. De Versammeln beslut achteran bi "Dütt un Datt", dat Ehrungen vun hüde an, för alle Maaten gifft. As Erklärung: Fröher is dat woll so wesen, dat man blots Lüüe de ok wat dohn hebbt, eehrt worden sünd. Dat hett aber nu Anfragen geben vun Maaten de nich so aktiv wesen sünd un dor hett de Vörstand nu beslaten, dat natürlich ok de dat verdeent hebbt geehrt to werden, wenn se so lang in de Speeldäl sünd. Alle Maaten warrt nu eehrt, wenn se 25, 35, 45, 50, 55, 60 Johre usw. in de Speeldäl sünd. Dat hett de Versammlen eenstimmig besloten. Üm 19.30 Uhr hett de Vörsitter bi alle Lüüe för ehr Kammen bedankt un de Sitzung beendt.

Een poor mehr Biller findt Se in use Galerie