Generalversammln an`n 14.01.2018

So, dat nee Johr hett good anfungen, wi hebbt een neen Vörstand. Aber de Rege nah:

An 14.01.2018 hebbt sick klock söss (abends) in´n Clubraum vun Achimer Kasch 27 Lüe infunnen.

De Vörsitter Tim Beinker hett se begrööt un faststellt, dat de Versammeln fähig to´n besluten is. Verännerungen bi de Maatens geev dat eers an Enn vun de Versammeln, as Katja (eene nee Schauspeelerin) sick entschluten hett bi us intotreten, also een mehr. De Achimer Speeldäl hett nu also 79 Maatens. De Sensemann is dat letzte Johr an us vörbitogen. Is ok good so wesen, de letzten Johre weern schlimm noog. Bi sien Johresbericht hett de Vörsitter all de Termine vörleest un tosamenfaat, de se ok hier op use Internetsiete wies werren könnt. Achteran hett Günther Kothe as Speelleiter noch een poor Wöörd seggt. De Saison is good lopen un he hofft, dat dat so wieter geiht. Dornah hett de Kassenbaas sien Bericht afgeven, aber de geiht man blots de Maatens wat an, dorüm stellt wi denn hier nich rin. De Kassenpröfers hebbt ok nix to meckern. Jochen Davids is tofreden un beantragt de Entlastung vun Vörstand, de eenstimmig erdeelt warrt. Jochen Davids warrt denn ok as Wahllleiter wählt un schlägt Tim Beinker as olen un neen Vörsitter vör. Dat Voting is eenstimmig un Tim Beinker nimmt de Wahl ok an. Bit op denn Posten vun de Schriftföhrer/in warrt se all wedder wählt. Bit op denn Böhnenobmann, Herbert Görke, all eenstimmig. Bi Herbert hett sick eene em nahestahende Person entholen. As Schriftföhrerin staht Brigitte Ulrich nich mehr to Verfögung. Nah 50 Johren wull se nich mehr un dat is ja ok man verständlich. De Vörsitter hett sick aber vörher vun ehr versekern laten, dat se de Geburtsdagskarten wieterhen schrieben deiht, also man keen Bang. Dat geev Vörschläge vör de Wahl aber dat geev twee Afsagen ehr dat Anika Bosenius ehre Tostimmung geven deiht. Se is denn ok eenstimmig wählt worden un wi freiht us, se in us Team to hebben. Dormit is de Vörstand wedder vullständig. Bi Punkt negen: Dütt un Datt meldt sick use Kassenbaas nochmal un beandragt för de Biedräge dat SEPA-Lastschriftverfahren. Dat is de letzten Johre jummer schworer worden de Biedräge intosammeln, weil se nich mehr alle to de Versammeln hinkamen un dat gifft wohl keen anneren Vereen, bi denn se de Biedräge bar insammeln deiht.  De Versammeln hett eenstimmig beslaten, dat wi dat nu mit SEPA maken wüllt. De Maatens kriegt doröver noch een Breev, dormit se ehre Ünnerschrift leisten könnt. De Biedrag schall denn jummer to´n 30.06. jedet Johr afbookt werden. So mutt de Kassenbaas ok keene Mahnungen mehr schrieven, blots weil dat mal een vergeten harr. För de Fohrt in düt Johr geev dat keene Vörschläge ut de Versammeln, de Vörstand warrt sick wat överlegen un siene Maatens överrasschen. De Versammeln hett uterdem beslaten, dat wi us för dat Logo vun dat immaterielle Kulturgut vun de UNESCO bewerben schüllt. Dat is jichenswatt, mit denn een denn ok viellicht lichter an Europäische Fördermittel kamen kunn, wenn dat mal nödig is. So, un för de, de sick all wunnert hett, dat Brigitte ogenschienlich nix för ehre 50 Johr kregen hett, kummt wi nu to denn letzten Punkt.

För ehre ganze Arbeit hett Brigitte natürlich ok wat kregen. Vun de Achimer Speeldäl hett se een groden Geschenkkorv kreegen un vun de Schauspeelers noch een Gutschein vun ehren Lieblingsitaliener. Vun den Bund Deutscher Amateurtheater geev dat eene schicke Urkund un de güldene Ehrennadel. Ünner groten Applaus hett de Vörsitter ehr de Saken övergeben. Un ok wenn se nix hebben wüllt, freiht hett se sick doch. Un wi freiht us, dat se ok wiederhen bi de Böhn dorbi is. So, leeve Lüe, dat is de Generalversammeln wesen. Hofft wi op een erfolgriekes un schönet Johr 2018.

Hol Jo fuchtig!

Mehr Biller könnt Ji jo in de Galerie ankieken.